عن مؤسسة شمس للنشر والإعلام بالقاهرة؛ صدر للكاتب الساخر "إيهاب طاهر" كتابه الجديد بعنوان " حمرا". يقع الكتاب في 444 صفحة من القطع المتوسط، ويضم 39 نصًا ساخرًا. تصميم الغلاف للفنان عمرو فهمي.
في مقدمة الكتاب؛ نقرأ لـ"إيهاب طاهر" :
لماذا لم تكن الكوسة حمراء؟
والخيار لماذا لم يكن كذلك أحمرا،
والقرع أيضًا؟
لماذا؟؟!
إشارة المرور - اللي بتعلم الناس الالتزام والاحترام والضبط والربط - حمرا
والطربوش أحمر
ومؤخرات القرود حمرا
وملابس النساء الجملية والمثيرة - جوة وبرة - حمرا
عادة النساء الشهرية التي تقوم بعكننة الأزواج؛ برضه حمرا
وفانلة نادي الشعب (النادي الأهلي) حمرا
وعين الحكومة حمرا
وعين الزوجة حمرا
وعين العفريت حمرا
وعين الغولة حمرا
وعين المخمور حمرا
وعين المسطول حمرا
وجهنم وبئس المصير حمرا
الأحمر لون ، ورمز ، ومعنى.
وكل المصريين يعرفون ويعوون جيدًا ما هي الحمرا، وما المقصود بها، فهي ليست بحاجة إلى تفسير أو توضيح أو إيضاح أو ترجمة.. وعلّ معظم الناس يودون قولها لبعض الناس، فكل منا يود قول "حمرا" لشخص معين، سواء كان هذا الشخص شخصية عامة، أو شخصية خاصة تمت له بصلة، أو شخصية اعتبارية أو رمزية.
وأغلب الظن؛ بل كل اليقين؛ أن كل مصري يقولها يوميًا في سره؛ بينه وبين نفسه؛ لمن يرى إنه أهلٌ لها؛ جديرٌ بها؛ يستحقها.. وقليلٌ منا من يقولها علانية.
وها أنا اليوم أقولها ، يا ترى أقولها لمن؟؟....
كتاب " حمرا" يضم 39 نصًا ساخرًا :
- حـمـرا
- فرويد يقول .. انت ما تقولش
- لماذا حمرا؟
- عين الحكومة حمرا
- عين الغولة حمرا .. وعين العفريت حمرا
- عين الزوجة حمرا
- عادة النساء الحمرا
- حمرا يا قوطة
- أبو راس حمرا
- أحمر يا قميص النوم
- الخطوط الحمرا .. الدين والسياسة
- ختم النسر و ختم الحمامة
- تفاح أحمر
- بطيخة لكل مواطن
- أحمر يا بلح زغلول
- الفانلة الحمرا
- الكروت الحمرا
- بابا نويل أطفال شوارع مصر
- طربوش على نعش
- بازل حرف ط
- أفضل تأمين للمصريين
- قفا وطني .. مستورد لأ
- الضحك على الميت حرام
- قـرّب .. خدلك عمود
- رقبة وزة
- نحن نزرع الكوسة
- الجامعات الميسرة.. للمجاميع الخرة
- نفذ رصيدكم ، الراسل: هيئة الصرف الصحي
- دمـاغ عالية بختم وزارة الصحة
- لص شارع مراد
- أنا شربت حشيش يا سعاد
- صوّتي يا أم حنان
- س: شغلتك إيه ؟ ج : جركن
- إن شاء الله .. لأ
- بحب في.. وما بحبش ما فيش
- بـغـل السـرجـة
- أنا عمتك شفيقـة
- حكايات جوهر
- سؤال كرومبو
• • • • •
إيهاب 
طاهر
ehabtaher7777777@yahoo.com
• المؤلفات :
- رئيس جمهورية نفسي : أدب ساخر .
طبعة أولى : المؤلف، يناير 2009
طبعة ثانية : المؤلف، أبريل 2009
طبعة ثالثة : سفنكس للفنون والآداب، يوليو 2009
- طظ فيكم : أدب ساخر . دار العلوم ، القاهرة،
طبعة أولى : يونيو 2009
طبعة ثانية : أغسطس 2009
- حمرا : أدب ساخر . شمس للنشر والإعلام
طبعة أولى : سبتمبر 2009
- البريد الإلكتروني : ehabtaher7777777@yahoo.com
عين الزوجة حمرا
من كتاب " حمرا "
طبعًا كلنا عارفين امتى عين الزوجة بتكون حمرا، وإيه هي الحالات اللي بتحمر فيها عينها ؟...
طبعًا لما مصروف البيت يخلص منها قبل الشهر الجديد ما يهل، لازم تحمّر عينيها لجوزها علشان يديها فلوس تكمل مصاريف باقي الشهر..
ولما تطلب طلب من جوزها وما ينفذهوش كفستان جديد مثلاً أو شنطة وجزمة أو خاتم دهب أو حلق عاجبها أو سلسلة زي اللي جابتها جارتها أو زميلتها في الشغل وجوزها يرفض، في اللحظة دي لازم توريله العين الحمرا..
لما جوزها يعامل حماته اللي هي أمها وحش وما يحسنش استقبالها والحفاوة والترحيب بيها، لازم توريله العين الحمرا..
لما تعزم حد من أهلها في البيت وجوزها يقصر وتبأه السفرة مش قد المقام من وجهة نظرها، لازم توريله العين الحمرا..
لما تطلب تطلع مصيف هي والأولاد وجوزها يقول لها الظروف ما تسمحش أو نأجلها السنة دي، لازم توريله العين الحمرا..
لما جوزها يسلف حد من أهله فلوس أو يدي أمه فلوس أو يجيب لأخته حاجة نقصاها، لازم توريله العين الحمرا..
لما جوزها يفضل مرتبه هو هو ما يزدش ولا يرتفع؛ وكأن الذنب ذنبه؛ والمصاريف بتزيد والولاد بتكبر والأسعار في السوق بتغلا، لازم توريله العين الحمرا، وخصوصًا لما يكون زوج إحدى صاحباتها مدرس وبيدي دروس خصوصية وحالته وحالة مراته ماشية، تفضل تقول لجوزها أنا عارفة انت ما طلعتش مدرس زي فلان ليه؟ وإديت دروس خصوصية كان زمانا دلوقتي مرتاحين ومش شايلين هم حاجة أبدًا..
لما تظبط جوزها بيعاكس الشغالة أو بيعاكس جارتها أو تتصنت عليه وهو بيكلم زميلته في الموبايل بحنية وسهوكة، لازم توريله العين الحمرا..
لما تحس أو تسمع إن جوزها ناوي يتجوز عليها ويجيب لها ضرة ويجيب للعيال اخوات من أم تانية، لازم توريله العين الحمرا..
لما تلمح في عينه نظرة إعجاب لممثلة أو مطربة وهما قاعدين يتفرجوا على التليفزيون، أو تلمحه وهما ماشيين في الشارع بيبص لواحدة حلوة ماشية جنبهم، لازم توريله العين الحمرا..
لما يتجاهلها ويقعد في البيت ما يكلمهاش وما يبصلهاش وكأنها رجل كنبه أو كرسي حمام أو بلتكانة، لازم توريله العين الحمرا..
لما ييجي........ وما يعرفش أو ما يصمدش، وعرقه يبقى مرقه، لازم توريله العين الحمرا.
أما بأه الحالة الوحيدة اللي الزوج هو اللي بيوري زوجته فيها العين الحمرا هي لما بتقوم زوجته بضربه بُكس في عينه تورمها.. وتخلي عينه حمرا.. دي لو كانت من هواة الملاكمة ومحبي "محمد علي كلاي".
• • • • •
